Quando che sento notissie , come quela che la corte de cassassion ga fato in modo che le condane che ga'vuo Previti, vada in prescrission, se me rebalta el stomego e me domando in che casso de paese vivemo?
Adesso go capio parchè i la ciamava casa delle libertà, parchè nissuni de lori xe mai 'ndà in galera, gnanca quei che se la meritava sul serio, a parte che Previti bastava vardarlo in musana par capir se'l gera colpevole o no!!
E adesso, no capisso se xe par l'argomento che so drio tratar,ma me xe vegnio, un brusor de stomego che me toca tor na pastiglia, si no sta note no dormo!!
Çerto che vivemo in tun mondo de merda!
e adesso eccove la solita poesia:

8 Luglio 1981

Alberoni

Acqua de mar , verde ciaro,

Che franze, ora calma

Ora inquieta,

su la spiagia e sul faro.


Acqua de porto, più scura,

percossa da l’onda

profonda

che mete paura.


Calma laguna oleosa

Che ragi de sol,

al tramonto

sofonde de rosa


tera de verde e de fiori,

de semplice zente

che vive.

…de gioie e dolori

Francesco

eccove un'altra "poesia" :

Un giorno a rialto

Un giorno a rialto in mezo al marcà

‘na bela signora nel fior de l’età

Passandome a rente che cossa la fa?

Un per de fiipe la ga scaricà

:”madona che spussa” La zente diseva

E po i me vardava!

Amissi ve giuro che gero inoçente

Ghe vol del coraggio

In mezo a la zente

Voria insegnarghe cussì par trastulo

Un uso coretto del buso del culo

Francesco (29 dic.2004 ore 18.57)

el ritorno del gransio

Ai me amissi, che, co tanta passiensa,
ga ancora vogia de lesarme, un gran ringrassiamento. Se le mie poesie ve piase scrivè pur dei comenti che me farà sens'altro piasser. e adesso ve fasso lesar la prima che go scrito:

Parchè venessia?

Parchè no se sa più rider de gusto?
Parchè se se varda ma no se se vede?
Percossa se crede che “star su le nostre”
Sia giusto?

Parchè no parlemo co i nostri vissini
Percossa i bambini che zoga pei campi
Sfrenai, rumorosi, ga i oci pensosi?

Percossa sti marmi no ga più memoria,
più gnente ne dise, e co la vernice
par dir do monae, sporchemo la storia?

Parchè el gondolier sta de casa a Malghera
E’l rico foresto se gode sta tera?

Percossa ste acque , un dì rispetae,
xe adesso percosse, sbatue, inquinae?

E dime percossa le arti e i mestieri
Che vita ghe dava a tuti i sestieri
Xe quasi sparii?

El fero cantava fra incudine e massa
Prodotti de orto vendevase in piassa
Co sgurbie e scarpei se fava cornise

A man gera fate, co amor, le camise
E quando ti geri ancora sopia
Ligava el bragosso a la pescaria

E za se sentiva vegnir da lontan
E spandarse intorno ‘l profumo del pan

Adesso sta epoca ormai xe finia
Parchè?... sistu stanca?
Parchè vecia mia?

Francesco (21 marzo1978)